“என் படத்தின் மீதான அச்சுறுத்தல்களை நேர்மறையாக எதிர்கொள்வேன்”: அருள் எழிலன்

தமிழகம் மிக நெருக்கடியான காலக்கட்டத்தில் இருக்கிறது. போராடும் மக்கள் மீதும் மக்கள் பணிகளுக்காக சிறு அமைப்புகள் மீதும் அரசு ஒடுக்குமுறையை ஏவிக்கொண்டிருக்கிறது. தொடர்ச்சியாக ஊடகங்கள் மீதான தணிக்கை உத்தரவையும் அரசு பிறப்பித்துக்கொண்டிருக்கிறது. அரசின் ஒடுக்குமுறையை கண்டித்து அரங்கக்கூட்டம் நடத்தினால், அரங்கத்தின் மீது வழக்கு தொடுக்கப்படுகிறது. இத்தகையதொரு நேரத்தில் வெளியாகியிருக்கிறது ‘பெருங்கடல் வேட்டத்து’ என்கிற ஆவணப்படம். ஒகி புயலின் போது செயலிழந்த அரசு நிர்வாகத்தினை ஆதாரங்களுடன் அம்பலப்படுத்தியிருக்கும் இந்த ஆவணப்படத்தை இயக்கியிருக்கிறார் பத்திரிகையாளர் டி. அருள் எழிலன். சமூக-அரசியல் குறித்த பதிவுகளை களப்பணி செய்து தமிழில் எழுதிக்கொண்டிருக்கும் ஒருசில பத்திரிகையாளர்களில் டி. அருள் எழிலன் முக்கியமானவர். தன்னுடைய பத்திரிகை பணிக்காக பல அங்கீகாரங்களைப் பெற்றவர். பெயர்பெற்ற ஆவணப்பட, குறும்பட இயக்குநரும்கூட. ‘பெருங்கடல் வேட்டத்து’ ஆவணப்படம் குறித்து அவருடன் உரையாடினோம்…

‘பெருங்கடல் வேட்டத்து’ ஆவணப்படம் குறித்த பின்னணி பற்றி சொல்லுங்கள்.. ஒகி புயலின் தாக்கம் குறித்து ஆவணப்படம் இயக்கும் எண்ணம் ஏன் வந்தது?

“பத்திரிகை பணிகளினூடே ஆவணப்படங்கள், குறும்படங்களையும் இயக்கிக்கொண்டிருக்கிறேன். ஓவியர் ஆதிமூலம், நாடோடிகள் குறித்தெல்லாம் ஆவணப்படங்கள் எடுத்திருக்கிறேன். பல படங்களில் பிரதியைக்கூட பாதுகாக்க முடியவில்லை. ‘ராஜாங்கத்தின் முடிவு’ என்ற குறும்படம் சிறப்பான விமர்சனத்தைப் பெற்றது. அதுபோல ‘கள்ளத்தோணி’ என்ற படம் பேசப்பட்டது. மீனவர்கள் தொடர்பாக, ஆலைக்கழிவுகளால் கடற்கரையோர மக்கள் எதிர்கொள்ளும் சூழலியல், உடல் ரீதியான கேடுகள் குறித்து ஆவணப்படம் எடுத்துக்கொண்டிருக்கிறேன். சுனாமிக்குப் பிறகு மீனவ மக்களின் நிலையை ஆவணப்படமாக எடுக்க வேண்டும் என திட்டமிட்டிருந்த நிலையில் ஒகி புயல் என்கி்ற பேரிடர் நிகழ்ந்தது.

ஒகி புயலை இயற்கை பேரிடர் என முடிவுசெய்ய இயலவில்லை. இது அரசுகள் திணித்த பேரிடராக இருந்தது. மத்திய, மாநில அரசுகள் புயலால் பாதிக்கப்பட்ட மக்களை காப்பாற்றுவதற்குப் பதிலாக கைகழுவிட்டன. அவர்கள் புயலோடு போராடி மடிந்து பிணங்களாக கடலில் மிதந்து ஒதுங்கினார்கள். இந்தியா தன்னை ராணுவ வல்லமைமிக்க நாடாக அறிவித்துக்கொள்கிறது. அது உண்மையாக இருக்கும்பட்சத்தில் தன் குடிமக்களை காக்க அந்த வல்லமையை பயன்படுத்தியிருக்க வேண்டும். வானிலை ஆய்வுகள் தோல்வியடைந்துவிட்டன. புயல் வீசி முடிந்த பிறகு, புயல் வரப்போகிறது என்றார்கள். சென்னை-சேலம் எட்டு வழிப்பாதையை இந்திய ராணுவத்தின் தாழ்வாரங்களில் ஒன்றாக பெரும் பொருள்செலவுடன் செய்ய முனைகிறது அரசு. இவ்வளவு உள்கட்டமைப்பை செய்கிற அரசு, ஏன் மீனவர்களை காப்பாற்றவில்லை? கண்முன்னே அரசு மீனவ மக்களை கைவிட்டது. ஒகி புயல் பாதிப்புகளை நேரில் காணச் சென்றிருந்தேன். அந்த உந்துதலில் அரசுகளின் அலட்சியத்தை ஆவணப்படமாக்கும் பணியில் இறங்கினேன். என்னுடன் ஜவகர், ஜோ, ஜெயக்கோடி ஆகிய நண்பர்கள் தாமாக முன்வந்து இணைந்துகொண்டார்கள்.

’பெருங்கடல் வேட்டத்து’ படப்பிடிப்பின்போது படத்தின் இயக்குநர் டி. அருள் எழிலன்…

அரசை விமர்சிக்கக்கூடாது; அரசுக்கு எதிராக போராட்டங்கள் கூடாது என்று கடுமையான கட்டுப்பாடுகள் விதிக்கப்படும் இந்த நேரத்தில், அரசின் இயலாமையை பதிவு செய்திருக்கும் உங்களுடைய ஆவணப்படத்துக்காக ஏதேனும் மிரட்டல்கள் எச்சரிக்கைகள் வந்தனவா?

“எழுத வந்த காலம் முதல் சமூக பிரச்சினைகள் குறித்து பேசும்போதெல்லாம் காவல்துறையின் கண்காணிப்புகளுக்கும் விசாரணைகளும் இயல்பாக நடக்கக்கூடிய விஷயம்தான். இந்தப் படம் மிக அழுத்தமாக அரசை, அரசு கட்டமைப்பை காட்சியங்கள் மூலம் காட்சிப்படுத்தியிருக்கிறது. முதல்வர் எடப்பாடி பழனிச்சாமி, இந்தியாவிலேயே போராட்டங்கள் அதிகம் நடைபெறும் மாநிலம் தமிழகம்தான் என்றும் அந்தப் போராட்டங்களை புஸ்வானம் ஆக்கிவிட்டோம். இனியும் அப்படித்தான் ஆக்குவோம் என்றும் ஆணவத்துடன் பேசியிருக்கிறார். தங்களைக் காட்டிலும் பாஜக அரசை, மோடியை விமர்சிப்பதை ஆபத்தாக இவர்கள் பார்க்கிறார்கள். மோடிக்காக ஆட்சியை நடத்திக்கொண்டிருக்கிறார்கள் இவர்கள். இவர்கள்தான் 13 பேரைக் கொன்றார்கள், அனிதாவை கொன்றார்கள்..எத்தனை தற்கொலைகள்.மார்ச்சுவரிகள் நிரம்பி வழிவதாக சொல்கிறார்கள். பொருளாதார பிரச்சினைகள், போலீஸ் கொலைகள், கூட்டுக்கொலை அதிகரித்திருக்கிறது. பொம்மை ஆட்சியாளராக இருந்துகொண்டு போராட்டங்களை புஸ்வாணமாக்கிவிட்டதாக முதல்வர் சொல்கிறார். இவர்கள் பகைத்துக்கொள்வது யாரை? மக்களைத்தான். அதிமுக ஆட்சியாளர்களைப் பற்றி மக்கள் கடும்கோபத்தில் இருக்கிறார்கள். அதிமுக கவுன்சிலர் ரெண்டு ஜேசிபி வண்டிகளை வைத்திருக்கிறார்கள். 40% கமிஷன் வாங்கிக்கொண்டு, மக்களின் நிலங்களை அடித்து, பிடிங்கிக்கொண்டிருக்கிறார்கள். இந்த ஆராஜகங்களை விமர்சிக்காமல் என்ன செய்வது? ஆவணப்பட இயக்குநராக என் படத்துக்கு வரும் எதிர்வினைகள், அச்சுறுத்தல்களை நேர்மறையாக எதிர்கொள்வேன். இதுவரை அப்படியேதும் இல்லை.”

உங்களுடையது ஆவணப்படமா? அரசியல் பிரச்சாரப் படமா?

“இரண்டு குழந்தைகள் பெத்துக்கோங்க. பெண்சிசுக்கொலை செய்யாதீங்க’ என சொல்வது பிரச்சாரப் படம். தூத்துக்குடியில் போராடுகிறவர்களை சமூக விரோதிகள் என்பது பிரச்சாரம். இல்லை நீங்கள்தான் தீவிரவாதிகள் என்பது எதிர்பிரச்சாரப் படம். புயலால் தூக்கிவிசப்பட்டவர்களை நீங்க மீட்கவில்லை, அவர்கள் கடலில் மிதந்து இறந்து போனார்கள் என்பது எதிர் பிரச்சாரப்படம்.

என்னுடைய படத்தில் படல்களையோ, இசையையோ சேர்க்கவில்லை. படத்தில் வரும் இருபாடல்களும் படப்பதிவின்போது பதியப்பட்டவை. ஆவணப்பட ட்ரைலரை பார்த்தவர்கள் இது கலைத்தன்மையோடு வெளிப்பட்டிருப்பதாக சொன்னார்கள். பார்வையாளர்கள் பார்க்கட்டும். அவர்களே இறுதி தீர்ப்பு எழுதுகிறவர்கள்.

இன்னொரு விஷயத்தையும் இங்கே சொல்ல வேண்டும். சமூகத்தில் வர்ணாசிரமம் கடைப்பிடிக்கப்படுவதுபோல், கலை சூழலிலும் வர்ணாசிரமம் இருக்கிறது. இவர் நம் இயக்கத்தவர், அமைப்பைச் சேர்ந்தவர்கள், கட்சியைச் சேர்ந்தவர் என பிரித்து ஒதுக்கியே விருதுகளும் அங்கீகாரங்களும் தரப்படுகின்றன. நான் விருதுக்காகவோ அங்கீகாரங்களுக்காகவோ படம் எடுக்கவில்லை. நான் உயிர்வாழவும் மக்களுக்காகவுமே படம் எடுக்கிறேன்”.

குறுநேர்காணலாக இருந்தாலும் டி. அருள் எழிலனின் பேச்சு, அவருடைய எழுத்தைப் போல அழுதத்துடன் முடிகிறது.  ‘பெருங்கடல் வேட்டத்து’ ஆவணப்படம் திரையிடல் ஞாயிறு(08-07-2018) மாலை கவிக்கோ அரங்கத்தில் நிகழ்கிறது.

ஆவணப்படம் குறித்த மேலதிக தகவலுக்கு arulezhilan@gmail.com என்ற மின்னஞ்சலை தொடர்பு கொள்ளலாம்.

நன்றி – https://thetimestamil.com/2018/07/07/என்-படத்தின்-மீதான-அச்ச/

Be the first to comment

Leave a Reply

Your email address will not be published.


*